cerita rakyat madura

Pangeran Maduratna

Karaja’an Mataram nalekana Sultan Agung, Kabilang Karaja’an se jemjem, taremtem, aman, ma’mor, jaja tor raja. Namong saamponna egente pottrana Sunan Amangkurat 1 se asma temorra Pangeran Aryo Prabu Adi Mataram, Karaja’an Mataram pas sorem. Soremma karaja’an mataram gapaneka amarga Sunan Amangkurat 1 kala politik dha’ Balanda. Sunan Amangkurat 1 ta’ ngarte dha’ karebba Balanda se gus-mabagus, se thel-makanthel dha’ salerana gapaneka, sanyatana agandhu’ neyat ta’ sae.
Neyadda Balanda se nendhiya Mataram tekka. Sunan Amangkurat 1 poron tor narema dha’ parjajiyan se ebadhi balanda. Sunan Amangkurat 1 ta’ arassa ja’ lem – dhalemma essena parjanjiyan gapaneka malontor dha’ kakobasa’anna Mataram serta bakal manyangsara’a ra’yat.
E dhalem parjanjiyan gapaneka, Mataram parsasat eator balanda e dhalem sadaja perkara, kong – langkong dhalem hal perdagangan. Berrassa ra’yat ban pergi laenna kodu ejuel dha’ balanda klaban arga modha, seddheng rang – barang kabutowanna ra’yat garabanna balanda akadi gula, buja, angguy sareng laennepon epalarang. Daddi ra’yat nyangsara tor laep, nagara ta’ aman.
Sabellas taon ra’yat nyandhang sangsara. Sabellas taon jugan ra’yat adhante’ dhatengnga pamimpin anyar, pamimpin adil tor pamimpin se bias marduli dha’ ra’yat sareng nagarana. Pongkasanna bajja onggu, panyo’ona ra’yat Mataram ekabbuli sareng se Kobasa. Pamimpin se ekakareb ngombar onggu. Pasera pamimpin anyar gapaneka? Tadha’ laen, enggi gapaneka sattreya Madura asal Sampang, asmana Pangeran Trunojoyo aliyas Pengeran Maduratna. Salerana teddha’ majapaet toronan kapeng sabellas dhari Rato Brawijaya. Ra’yat sakalangkong bunga.
Ponapa margana ma’ pas Pangeran Trunojoyo se eponjung sareng ra’yat Mataram? Kasebbut e dhalem babat…, nalekana Sultan Agung matellok Madura, sala settong pottrana Rato Madura epondhut sareng Sultan Agung, asmana Prasena. Presena eanggep potrana dibi’, eemmong marabut ana’ emmas. Sarengngan pole saamponna Prasena dibasa pas epaneka sareng potter Mataram sara eparenge pottra dhadhuwa’, se sareyang asmana Raden Demmang Mlaja, dineng se bungso asmana Raden Undagan. Raden Demmang Mlaja gapaneka se noronnagi pangeran Trunojoyo.
Pangeran Trunojoyo badha e Mataram sampe’ aomor sabellas taon. Daddi ce’ ngagalina dha’ kabadha’anna soremma karaja’an Mataram. Ngagali juga ja’ Amangkurat 1 not – nonot malolo dha’ sajjana balanda. Sapaneka jugan ngagali ja’ bannya’ karabat kraton se majau dha’ ka rato, marga efitna sareng ekamoso. Tamaso’ja’ sanyatana rato ta’ senneng dha’ Raden Demmang Mlaja, tape asennengngan dha’ Raden Undagan, klaban bukte nyata ramana eokom pate klaban ta’ sala, dineng majadhi’na eangkat daddi Bupati Madura sarta eparenge jajuluk Pangeran cakraningrat II. Sadaja kadaddiyan gapaneka eghandu’ sareng Pangeran Trunojoyo sampe’ nombuwagi loka se talebat dhalem neng panggaliyanna. Melana pas messen dha’ sadaja karabat karaton se ta’ senneng dha’ Amangkurat I sareng balanda, sopaja nyoson kakoadan sarta makoko parsatuwan sareng kasatuwan kaangguy malobar kamonapegan e Mataram.
Saampona dibasa, Pangaran Trunojoyo pas gubar dha’ Madura. E ka’dhissa salerana ngator sarta nyoson kakowadan kaangguy ngoser balanda dhari tana jaba. Parsatuwan sareng kasatuwan epakokp sopaja ngarep pamimpin se bias ngejabi ka odhi’anna ra’yat, sabab bupatina pangeran Cakraningrat II ampon ta’ ngejabi neng ra’yadda, daddi ta’ ekasennengnge, Cakraningrat II serreng adinggalagi kraton, alenggi neng Mataram sabit – abidda. Ra’yat asennengngan ngako rato dha’ pangeran Trunojoyo sanaossa ta’ apangkat rato. Melana sadaja tarekana pangeran Trunojoyo etarema tor etampa sareng ra’yat Madura. Kong – langkong pangeran Trunojoyo amo atatolong dha’ ra’yat. Sadaja kabutowanna ra’yat e ladine tor eejabi. Salaenna gapaneka salerana pajat teddha’ rato juga se ron – binoron marenta Madura.